O terceiro día da nosa estancia comezou cunha conversa coa recepcionista máis veterana do hotel, Elise Schut, que leva 25 anos traballando no mesmo. Elise, holandesa de raíces españolas, cóntanos como antigamente o edificio era unha casa que daba hospedaxe e axuda ós mariñeiros. Foi aquí a onde chegou Avelino, que era mariñeiro de profesión, buscando traballo, e aquí atopou teito e axuda, conseguindo pouco despois un posto nunha compañía de transporte marítimo.

Posteriormente houbo unha fusión das dúas casas de mariñeiros cristiás de Rotterdam, a católica e a protestante. O ‘Stella Maris’ pasou a ser unha fundación e tamén un hotel, que recibía axudas estatais para así poder cobrarlles un módico prezo a aqueles que precisaban a axuda, e orientábaos na busca de traballo.